دردشة مع الدكتورة سماح.. النوم ومولودك الجديد
- تاريخ النشر: الخميس، 25 فبراير 2021
? صباح الخير يا وجه الخير ? هوي بعرف يمكن تصلحيلي وتقليلي نحنا هلق مسا يا حبيبي بس معلش ماما لازم تعرفي أني أنا بأول خلقتي لسا ما بعرف الليل من النهار بس بعرف أنو وجهك متل وجه الشمس لهيك بس شوفك ما بقلك غير صباح الخير ?
? بعرف أنك دوماً مشتاقتيلي أنتِ وبابا وهديك تبع ال " يا الله شو كيوت أمانة فيقيه أمانة أمانة ?" وطبعاً حضرة هالغليظة بتحاول تفيقني بأنها تحط إصبعها الضخم بأيدي الصغيرة وبتصرخ يا عمرررري وبطلعلك درجة الواااع أنا?
قليلا أني طبيعي نام ١٤ ل١٧ ساعة بهالعمر ولازم كمان وإذا بترجع بتعيط جنبي بس أكبر رح أنتقم من ولادها ?
? بعرف أني ما عم خليكي تنامي منيح وكل ساعتين بفيقك بس هيك طبيعة كل الولاد يا ماما.. لسا كروشي مو متعبى منيح وجوعان بدي أكل ? مو بدك خدودي يتعبوا وبطوني يبان ? لازم أول أسبوعين إذا ما فيقتك أنتِ تفيقيني لتطعميني وإلا بنحف وبروحوا الخدود المارشميلو ?
?ببلش أعرف نام بالليل يا مامي بعمر الشهرين ل٣ شهور وقتها بس بتقدري تشبعي نوم يا عمري بس كمان ل٥ أو ٦ ساعات وبعدها برجع بنطلك بدي نني??
? هلق أنا بعشق حضونك الدافي بس مع هيك وقت بكون عمري أسابيع ما لازم تنيميني معك على تختك.. كل واحد فينا بتخت بس قلبك معي وقلبي جوا قلبك ? هالعادة الصحيحة بتحميني من #متلازمة_موت_الرضيع_المفاجئ لهيك مامي لا تخلي الأمومة والحب يكون سبب ألم وخلينا من أول ما #قطعنا_الحبل_السري تتركيني أعرف أمشي بالحياة بس لا تنسي قلوبنا سوا ما حدا بفرقها ?
? لازم وقت تنيميني تسطحيني عضهري مو عبطني ولا عجنبي ولازم تتأكدي أنو التخت ما فيه ولا شي لا بطانية ولا مخدة ولا لعبة ولا شي أبداً.
? ما في ضرر من أنك تحطيلي لهاية بس إذا فقتي عليي وشفتيها نازلة تركيها بكون مليت منها ?? وانتبهي ماما أني بهالعمر جسمي حساس للحرارة فما تلبسيني ألف قطعة ودفاية وصوبيا.. بالمعقول بالمعقول يا ماما?
? هديك المرة فقت وأنتِ كنتي فرطانة نعس وبابا المزعج كان عم يتفرج عمباراة وأنا وياكي تخانقنا عالنومة بس والله مو الحق عليي.. لازم لأعرف نام وأتعود أرجع نام بالليل تكون الإضاءة خفيفة وما حدا يحكيني يعني #هدوء_كامل ?
? سمعت هديك المرة جارتنا عم تهبد وتقلك تعبيه و #لا_تخليه_ينام_بالنهار ليشبع نوم المسا.. لا تسمعيلها لأنو إذا ما نمت وقت حاجتي بقلق بالليل وما بعود أعرف نام ومنسهر ومنتخانق أنا وأنتِ وبتوصل صواتنا لعند هالغليظة 
? والله رجعت نعست عهالحديث فاحمليني هلق وضميني لصدرك الحنون وغنيلي وضلي حبيني وأي عهالسيرة كمان قال الأطفال يلي بيحملوهن أهاليهن بحسوا بانزعاج ومغص أقل.. هي عالحنية منتعافى ?? تذكري أنك أماني وبيتي الدافي وراحتي الوحيدة وصح أني بكتير أوقات بسرق منك راحتك بس أنا بذرة تربتك الطاهرة لأكبر بدي مطرك وبدي حنيتك ودفاكِ ? بحبك ? كنت معكم سَماح صالح محمد ?
