دردشة مع الدكتورة سماح.. أكيد بكون صار معن ارتجاج دماغ وراحوا فيها?

لك شايف شايف كيف دقوا ببعضن ? أكيد بكون صار معن ارتجاج دماغ وراحوا فيها ?

والله يا جارتي من أول ما خبطت بنتي خفت عليها يكون صار معها ارتجاج دماغ فوراً أسعفتها عالمشفى لصورها وأطمن ?

فشو هاد #ارتجاج_دماغ؟

• ارتجاج الدماغ أو ما يسمى #brain_concussion هوي أذية شائعة جداً بتصير غالباً بعد حوادث معينة متل حادث سقوط، سيارة، لبطة ?، أو كم واحد عم يلاحقو الطابة قام شاطوا روس بعضهن بدالها ??
• فعلياً المصطلح هيك معبّر أنو ارتجاج الدماغ لأنو يلي بصير فعلاً أنو الراس برّج ونتيجة السرعة بذهابو وإيابو (قصص فيزيا وتسارع وهيك).. بصير خلل وظيفي مؤقت بالدماغ يعني متل أنو واحد قاعد عم يشتغل علابتوبو وبيجي ابن أختو الغليظ بهزو يمين ويسار فلفترة قصيرة لبين ما أمو تضبو هالزلمة ما حيعرف يشتغل ويخبصلو شوي ??
• شو التخبيصات يلي بتصير بالدماغ؟

ممكن ومو قاعدة عامة أبداً.. أنو المريض بيفقد الوعي بس مو أكتر من عشر دقايق وكلما طالت المدة معناتو الأذية أشد بس عند الأطفال طبيعي تمد لتلت ساعة.

بعد ما يفيق المريض بحس حالو مو على بعضو.. مضطرب يعني وبكون نسيان شو صار وعم يسألك لك أنا وين؟ شو صار معي؟ تماماً تماماً أكيد تبادرت على أذهانكن مشاهد كتير مسلسلات وأفلام أنا شخصياً تذكرت برهوم بالفصول الأربعة لما صحي مو عرفان حدا بالعيلة وبلش بهدلة فيهن مسح فيهن الأرض وعفكرة صح طبياً لأنو من مضاعفات القصة على المدى البعيد ممكن تغيرات عاطفية، عقلية، جسدية واضطرابات ذاكرة..

ممكن المريض بعد الصدمة تشوفوه دايخ، نعسان، عم يستفرغ، معو صداع شديد، غثيان، حساسية من الضو والضجة، ما عم يقدر يتوازن، زايغ نظرو..

وعند الأطفال كتير مميز الإقياء وعادة بتكون إقيائاتهن شديدة وبدها سيرومات #تعويض_سوائل ?

• خلينا نعرف أنو مو بالضرورة يصير كل هالأعراض، حسب الحالة وشدة الأذية.. وخلونا نعرف أنو مو بالضرورة فوراً تصير هالأعراض.. ممكن ما تظهر لبعد ساعات، أيام، أسابيع وحتى أشهر.. فإذا خلعت حدا بسيارة خليك قلقان لشهور معلش منشان تتعلم ما تأسرع وتشفط 
• وقت بتسعف المريض عالمشفى نحنا منفحصو وممكن من علامات معينة نشخص بس لا بد نطلب #طبقي_ومرنان لنتأكد من أنو ما في إصابات خطيرة، ما في نزوف، كسور لأنو ارتجاج الدماغ ما بخوفني وإنما اللي ممكن يصير مع ارتجاج الدماغ..

بارتجاج الدماغ المادة الدماغية سليمة تماماً هوي بس حبيبنا القائد عم يرجلو شوي ويهزلو شوي وبعد فترة لحالو بيركز وبيرجع لطبيعتو ??

• القاعدة العامة الحمدلله هي الشفاء التام بس ما في وقت محدد.. نحنا بالمشفى منراقب المريض ل٢٤ ساعة بس لنطمن أنو ما في مشاكل تانية ?
• ما في علاج ضروري.. مسكنات للصداع بس

لكن ممكن جداً أنو إذا تكرر ارتجاج الدماغ يصير في عنا مشكلة وبدها تداخل طبي وممكن جراحي.. لهيك منوصي المريض يرتاح يهدى ما يحاول يهز راسو ولا يركب موتور ولا يمارس شي رياضة عنيفة وهيك..

سلامة راسو دماغنا الحبيب من الارتجاج وغير الارتجاج..

غالي كتير هوي ديروا بالكن عليه ?

ويمكن ما عاد نرتعب من هالمصطلح بعد ما فهمناه أكتر!

كنت معكم سَماح صالح محمد ? السنة الأخيرة في جامعة دمشق