دردشة مع الدكتورة سماح.. الشعرانيّة Hirsutism ?
#الشعرانيّة_Hirsutism
? عمرها ١٧ سنة.. شافت شعر على صدرها (حول حلمة الثدي).. ارتعبت.. حست حالها مو طبيعية ومو أنثى.. ألف فكرة راحت واجت براسها وضلت مخباية الموضوع من خوفها.. مع الوقت بقي الخوف مسيطر عليها وصارت قلقانة ومكتئبة!
هل يا ترى خوفها للصبيّة مبرَّر؟
فيديو ذات صلة
This browser does not support the video element.
تعالوا نشوف سوا عن الشعرانية #سؤالاً_وجواب ?
⭕ شو يعني شعرانية؟ وهل هيي نفسها فرط الشعر؟
✔ الشعرانية يعني نمو الشعر بمناطق غير مرغوبة.
يعني أنو يطلع للبنت شعر بمناطق بيطلع فيها للشب بالعادة.
بينما فرط الشعر يعني شعر زايد بمناطق طبيعي يطلع فيها الشعر.
⭕ شو هيي المناطق يلي مو من الطبيعي يطلع فيها الشعر؟
✔ الوجه، الصدر، أسفل البطن.
⭕ طيب الحالة خطيرة؟
✔ ببيئتنا وعرقنا نحنا يعني جماعة البحر الأبيض المتوسط ما منعتبرها خطيرة متل الأوروبيين.
بصراحة نحنا عنا طبيعي هالشي تقريباً مقارنةً فيهم والخطر يلي جاية من هالحالة هوي بسبب الأمراض يلي ممكن أنها تكون نتيجة الها.
على كل حال لازم نعرف أنو ١٠٪ من النساء الطبيعيات عندهم شعر على وجههم وحول هالة ثديهم.. و ٢٠٪ عندهم شعر على صدرهم بالنص (منطقة القص)
وهدول طبيعين ومو بحاجة علاج!
⭕ طيب ايمت بصير الوضع مرضي مو طبيعي ولازمو علاج؟
✔ تمام.. هالأشعار يلي قلت أنهم طبيعين عند نسبة معينة من النساء منسميهم طبياً #أشعار_أساسية.
بتكون الأشعار أساسية عند الأنثى وقت بتكون دورتها منتظمة وما عندها أعراض ترّجل.
⭕ شو يعني أعراض ترّجل؟
✔ يعني أعراض ذكورة عند الأنثى متل مثلاً خشونة الصوت، حب الشباب، نمو عضلات الصدر، تضخم البظر، الصلع الصدغي ( صلع جانب الأدن ).
⭕ يعني إذا ما كان عندها كل هالأعراض بتكون البنت طبيعية؟
✔ مو هيك بالضبط.
بس أنا عم فسّر النسبة الطبيعية.. لكن أنثى عندها شعرانية ودورتها مو منتظمة ممكن يكون معها مشكلة عاملتلها الشعرانية وممكن لاء.. بس بهمّني ما تخاف ولا ترتعب.. ممكن تكون الشعرانية طبيعية!
⭕ طيب شو سبب هالشعرانية؟
✔ سببها هوي ارتفاع الأندروجينات ومن أهمها هرمون التستوستيرون.
لحظة.. لحظة.. أنثى وتستوستيرون؟!
اي بجسم الأنثى دوماً في إفراز لهرمون التستوستيرون بيجي من المبيض والغدة الكظرية بس طبعاً بمستويات منخفضة.. وقت بتزيد هالمستويات بصير الوضع مرضي وبصير مع الأنثى علامات الترّجل يلي منها الشعرانية.
هاد الكلام بيعني أنو الأنثى يلي معها أعراض ترّجل لازم بتحاليلها يطلع التستوستيرن مرتفع!
بصراحة مو بالضرورة.. القصة متعلقة بأكتر من عامل.
قبل البلوغ بكون جسمنا مغطى بشعر ناعم وفاتح منسميه وبر.. بعد البلوغ بيتحول لشعر مجعد غليظ وغامق.
السبب بهالتحول هوي الدي هايدرو تستوستيرون اللي بيجي من التستوستيرون عن طريق أنزيم اسمو 5_ألفا ريداكتيز.
لهيك أي خلل بأحد هال٣ رح يعمل شعرانية.
⭕ طيب فهمنا أصل الحكاية بس هلق المهم عطينا الأسباب المباشرة بقى وبالتفصيل؟
✔ بس قبل ما احكي لازم نوّه أنو الشعرانية ممكن تكون مجهولة السبب.. وفي أسباب للشعرانية قليلة الخطورة.. منعرف هدول وقت بتبلش الشعرانية من البلوغ أما والله شعرانية صايرة جديد فهي حتماً مخباية وراها مشكلة.
فإذاً مهم جداً ايمت بلشت الشعرانية وشو الأعراض يلي معها
وهلق بقى تعوا نحكي بشو منفكر إذا اجتنا مريضة معها شعرانية!
? أشيع سبب #متلازمة_المبيض_متعدد_الكيسات #PCOS.
? الشعرانية مجهولة السبب ممكن تكون هي مرتبطة بفرط الدرق او القهم العصبي أو البورفيريا.
? أورام الغدة الكظرية.
? متلازمة كوشينغ.
? أورام المبيض.
? تعرض خارجي للأندروجينات متل الأدوية مثلاً.
⭕ كيف منشخص المشكلة؟
✔ لا بد نحنا بحاجة قصة مرضية وفحص سريري.. محتاجين نعرف إذا في بالعيلة حدا معو شعرانية أو في قصة لمبيض متعدد الكيسات.
لازم نعرف الأدوية يلي عم تاخدها المريضة لأنو ممكن كتير تكون هيي السبب.
رح نطلب تحاليل هرمونية، تصوير إيكو منشان موضوع تكيس المبايض، رنين منشان الغدة الكظرية والمبيض.
وبرجع بأكد من أشيع الأسباب هيي الشعرانية مجهولة السبب لكن لا تشخص إلا بعد نفي الأسباب التانية.
آخر شي نحنا الأطباء منقيّم الشعرانية بناءً عمقياس اسمو #مقياس_فيرمان_غالوي .. على حسب المناطق يلي طالع فيها الشعر.. هنون ١١ منطقة ولكل منطقة منعطيها درجات من 0 يعني ما في ولا شعرة لل4 شعرة مجعدة.
المناطق هنون:
الشفة العليا، الذقن، الصدر، الساق، الفخذ، أعلى الذراع، الساعد، الجزء العلوي للظهر،أسفل الظهر، أعلى البطن، أسفل البطن.
الأنثى يلي معها 8 درجات فما فوق مصابة بالشعرانية.
⭕ آخر سؤال شو علاج الشعرانية؟
✔ علاجها من علاج سببها وممكن يكون هالعلاج كل الحياة أو لفترة قصيرة أو أحياناً بكون العلاج تجميلي مو دوائي.
كأدوية ممكن يوصف الطبيب حبوب منع حمل أو أدوية مضادة للأندروجينات.. ماننا بصدد نذكرها هلق.. هاد شغل الطبيب وخطيرة جداً تتاخد الأدوية من راس المريض.. إلا أدوية الهرمونات #أوعى ?
إذا كانت المريضة بدينة منطلب منها تخفض وزنها ممكن هاد يكفي كعلاج.
وممكن الحلاقة المستمرة تكون هيي الشي الوحيد يلي فينا نساويه للمريضة ?♀️
??? المهم أنو لا تخافوا من الموضوع ولا تعتبروا الموضوع ممكن يأثرّ على الأنوثة.. مجرد مشكلة طبية وبتنحل وممكن تكون طبيعية بحاجة للتأقلم والتعود وبس.
المقال طويل بس حاولت أني حيط بالموضوع من كل جوانبو لهيك طول وطول الكلام.
وملاحظة طبية أخيرة أنو في دراسات بينت ارتباط الشعرانية بالدورة الغزيرة والمستمرة لأكثر من ٧ أيام.. لهيك الأنثى يلي بتشوف دورتها هيك ممكن يكون طبيعي أنو معها هيك مشكلة.
كنت معكم الدكتورة سَماح صالح محمد ?