دردشة مع الدكتورة سماح.. لا تخلي هالحزن مكبوت جواتك.. ابكي بترتاح!

?لا تخلي هالحزن مكبوت جواتك.. ابكي بترتاح!

بعد انفصال أليم بتمرق بالطريق وبتشم ريحتو.. ريحة عطرو يلي كان دوماً يبخها.. دماغها وبالضبط الجهاز الحوفي المسؤول عن المشاعير والعواطف والأحاسيس بيتفعل وبيبعت للقشرة الحكيمة أنو يا حبيب أنا حزين? تذكرناه بدنا نبكي يلا ?

وبالفعل القشرة بتأمر أنو يلا بلشوا بكي! هالدموع الها اسم خاص فيها #الدموع_العاطفية وهيي نوع من ٣ أنواع من الدموع.. ضيفوا الدموع الأساسية والدموع الإنعكاسية. داروين بزماناتو قال  #الدموع_العاطفية_بلا_هدف بس علماء النفس خالفوا داروين وأكدوا أنو الدموع العاطفية بتقدر تحسّن نفسيتك لو لاقيت دعم بعدها .. يعني من الآخر أنتَ بس تبكي بتكون عم تعطي إشارة أنو أنا بحاجة دعم معنوي ممكن يكون دعم أكلي فالبيتزا أو الشاورما كمان يعتبروا دعم ترا ها ?

أضافوا علماء النفس أنو البكاء أصلو جاية من أصوات الحيوانات ? والدليل قال حتى البيبيات يلي غددهن الدمعية لسا مو متطورة وما فيهن ينتجوا دمع مرئي هنن بيبكوا وبصوت عالي ليطلبوا الدعم يعني منعتبر البكي هوي محاولة تعبير عن أزمة معينة.. ماما جوعان ماما عطشان ماما نعسان ماما مالل.. ماما ما فيي شي بس عم نكّد ? عسيرة النكد قال المرأة بتبكي أكتر من الرجل بمعدل ٣ ل٤ مرات ضعف ? وبتكون حادة ببكائها أكتر.. ما حطوا السبب ما بعرف ليش بس أكيد مو نكد ? لأنو في حقيقة علمية لكن ما زالت غير مؤكدة بشكل كامل بتقول أنو محتويات الدمع مو ماء وبروتينات وبس..

كمان في هرمونات شدة بتطلع مع الدمع وهيك ممكن تكون الجملة يلي بدينا فيها المقال تبع #ابكي_بترتاح صحيحة.. لسا بحاجة دراسات.. آخر شي لا تفكروا الدموع بس برطبوا العين ولا بس بعبروا عن عاطفة معينة...

كمان هنن مهمين كتير ليحموا العين من الإنتانات والأعداء الجراثيم والفيروسات ? عهالسيرة لا تنسوا أنو الامتحانات كتير بتبكّي وخاصةً زنقة الكلاب ? فيفترض تبكوا معلش منشان يدعموكن معنوياً وطعامياً.. في شي ببكي أكتر.. إذا ما بصّيتوا عالمصادر تحت..

 كنت معكم سَماح صالح محمد ?